Breved 📝

Loadoù da sikour … 💡

Annabac

Prientiñ an arnodenn dre gomz 🗣️

An arnodenn dre gomz evit ar Breved a vez anvet ur soutenañs raktres, hag a dalvez evit 100 poent diwar 800.

1. Petra eo resis ? 🤔

E-pad an arnodenn e vez goulennet digant ar skolajidi kinnig, dre gomz, ur raktres prientet a-hed ar bloavezh.

Ar bodad arnodenniñ a zo savet gant daou ezel eus ar skipailh pedagogiezh d’an nebeutañ. Un notenn diwar 100 a vez roet gante : 50 poent evit perzhded an ezteurel dre gomz hag 50 poent evit mestroni an danvez kinniget.

Div lodenn a zo d’an arnodenn :

an eztaoladenn : kinnig ar raktres hag an doare da labourat.
an emziviz : respont d’ar goulennoù savet gant ar bodad arnodenniñ en un doare sklaer.

Gallout a ra ar skolajidi kinnig an arnodenn dre gomz en un doare :

hiniennel : padout a ra an arnodenn 15 munutenn (5 munutenn eztaoladenn + 10 munutenn emziviz)
a-stroll (3 skolajiad d’ar muiañ) : padout a ra neuze an arnodenn 25 munutenn (10 munutenn eztaoladenn + 15 munutenn emziviz)

2. Peseurt danvez kinnig ? 🤯

An dibab a zo etre danvezioù disheñvel :

ur C’helennadurezh Pleustrel Etrediskiblezhel (KPE – Enseignements Pratiques Interdispilinaires)
un Hentad desavadurel (dazont, keodedel, deskadurezh arzel ha sevenadurel, deskadurezh d’ar yec’hed)
Istor an Arzoù
ur raktres diavaez ar skol (staj en un embregerezh, emouestl kevredigezhel, …)

3. Penaos kinnig an eztaoladenn ? 📋

An danvez dibabet a rank bezañ un danvez kar evit dont a-benn da vezañ dedennus ha reiñ c’hoant d’ar bodad arnodenniñ da c’houzout hiroc’h.

Evit bezañ sklaer e ranker lodenniñ an eztaoladenn. Setu skouerioù da sikour evit sevel an eztaoladenn :

KPE pe Hentad desavadurel
- un digoradur (30 eilenn) : en em ginnig (anv, klas), kinnig an danvez dre vras.
- ul lodenn gentañ (1 vunutenn) : displegañ dre benaos eo bet studiet an danvez-mañ hag ober liammoù gant an danvez-kelenn, hag ar bloavezh-skol a-bezh.
- un eil lodenn (2 vunutenn) : kinnig an tudennoù pennañ liammet d’an danvez, dielfennañ an dalc’hioù pennañ e liamm gant an danvez, ar goulennoù hag ar c’hudennadurioù degaset gantañ, displegañ pouezusted studiadenn an danvez-mañ hirie-an-deiz.
- ur c’hlozadur (1 vunutenn) : arguzenniñ dibab an danvez-mañ.
Istor an Arzoù
- un digoradur (30 eilenn) : en em ginnig (anv, klas), kinnig an oberenn (titl, skor, deiziad, oberour, kenarroud, oberennoù all an arzour, …).
- ul lodenn gentañ (30 eilenn) : displegañ dre benaos eo bet studiet an oberenn-mañ hag ober liammoù gant an danvez-kelenn, hag ar bloavezh-skol a-bezh.
- un eil lodenn (2 vunutenn) : diskrivañ an oberenn (livioù, diarsell, …).
- un trede lodenn (2 vunutenn) : dielfennañ an oberenn (peseurt kemenadenn a vez treuzkaset gant an oberour?, peseurt sterioù a zo a-dreñv?…).
- ur c’hlozadur (30 eilenn) : diverrañ an eztaoladenn hag arguzenniñ dibab an oberenn-mañ.
Raktres e-diavaez ar skolaj
- un digoradur (30 eilenn) : en em ginnig (anv, klas), kinnig an embregerezh/aozadur/kevredigezh.
- ul lodenn gentañ (1 vunutenn 30′) : diskrivañ obererezhioù an ti, an niver a dud o labourat ennañ, e aozadur, …
- un eil lodenn (2 vunutenn) : kinnig an obererezhioù bet graet e-pad ar prantad-labour, en un doare resis ha fetis.
- ur c’hlozadur (1 vunutenn) : diverrañ perzhioù mat ha perzhioù fall ar prantad-labour, peseurt skiant-prenet, ha daoust-hag-eñ en deus degaset un dra bennak d’an hentenn micherel?

4. Penaos kinnig an diaporama ? 🖼️

Ouzhpenn priziañ raktresoù kinniget gant ar skolajidi, e tle ar bodad arnodenniñ priziañ un eztaoladenn bersonel a c’hell dedennañ anezhe. An diaporama a servij neuze da zerc’hel soñj eus dibun an eztaoladenn met ivez da ziskouez mestroni ar binviji stlennegel.

Arabat d’an diaporama kemer plas an eztaoladenn dre gomz, n’eo nemet un harp evit aesaat ar skolajiad. Ret eo dezhañ bezañ sklaer, unvan, ha ket re hir.

Setu un nebeud kuzulioù evit sevel an diaporama :

krouiñ 10 diapozitiv d’ar muiañ
kinnig un diaporama aeret, ket re a ditouroù war pep diapozitiv
chom hep lakaat livioù skrijus, na re anezhe
chom hep lakaat re a skriturioù disheñvel
arabat skrivañ re, gerioù-alc’hwez hepken
arabat lakaat re a efedoù « buheziñ »
lakaat war-wel (islinennañ, druzañ, livañ,…) an elfennoù pouezusañ

5. Penaos prientiñ an emziviz ? 💬

An emziviz a bad etre 10 ha 15 munutenn. Goude an eztaoladenn e sav ar bodad arnodenniñ goulennoù d’ar skolajiad.idi evit mont donoc’h en danvez, evit gouzout hiroc’h war ar raktres, an doare da labourat, mennozhioù personel, …

Evit prientiñ an emziviz e c’haller raksoñjal ar goulennoù savet gant ar bodad arnodenniñ!

Alioù fur …

En em aozañ ha labourat en a-raok
Pleustriñ dre gomz
Kemer perzh dre gomz a-hed ar bloavezh-skol
Komz gant un ton asur ha sioul
Komz fraezh, ket re vuan
Analiñ
Chom hep sellet re ouzh an daolenn

Pennad savet gant sikour al load : Se préparer à l’oral du Brevet 2020 | Alveus Club